انا محتاج اتكلم عن "الردايفة" الناس اللي مش هيقروا الكلام ده و ده من بواعث صدقه الحمد لله :D و اني اخد راحتي بقى B|
رديف هو اللقب اللي بيطلق على المجند في اخر ٦ شهور من جيشه.
زمايلي اللي "نزلت عليهم" و استقبلوني و علموني.
مفيش حد منهم ظلمني ف يوم.
ميدو حجاج , ايهاب شهاب , احمد مروان , حامد عبد القادر و اخيرا الراجل اللي الجبل اخد من جسمه راقات , رديف الصبر كله ٣ سنين في الجبل , حمادة عبّاس.
اخص بيهم الذكر عشان هم اللي قعدوا معايا ولو ايام معدودة بس علموني كتير.
كنت بقول دايما عن فضل ميدو " كفاية اننا كنا رايحين له ف وسط المجهول من حياتنا و هو استقبلنا و طمننا" ده على الصعيد النفسي.
على الصعيد الانساني ميدو مطرب و صوته حلو و للاسف حاصر نفسه ف منطقة المهرجانات بس انا واثق انه هيحس بقدراته اكتر من كده.
ميدو نبهني لإن فيه اغنية لمصطفى قمر فيها اربع او خمس الحان و مقامات موسيقية مختلفة. وشرحهم بطريقة حد فاهم .
ايهاب , الراجل اللي تجارته ما شاء الله دايرة بملايين ماتوقفتش ولا مره وهو ف الجيش , ٤٠٠ يوم وهو في الجيش وفيه ناس كتير من التجار ما يعرفوش اصلا انه مجند :D الراجل ده علمني كتير على المستوى الانساني , ارتحت له و حبيته.
حامد , اللي لبس ٤٥ يوم سجن , يكفيه انه علمني جملة " في تمرين البطن , او اي تمرين , اللحظة اللي بتبدأ عندها تحس بألم هي اللحظة اللي المفروض تكمل بعدها عشان اللي بعدها هو المؤثر في التمرين و اللي قبلها مجرد عدد "
احمد خميس كمال مروان , دمنهور , البحيرة. افتكروا الإسم ده كويس.
فنان و مثقف وشاعر و guess what محامي بيحب دراسته ومهنته :D و بيحب دمنهور و اوبرا دمنهور , و جدع و عنده ملكة التعليم و الحضور لدرجة انه علم اتخن دماغ فينا :D :D
حمادة عباس , كفر الشيخ .
تلات سنين في الجبل.
و مش عاوز اتكلم عن ضياء وهاني عشان واحد صاحبي والتاني اخويا :D
احمد حمد الله المحترم تجارة القاهرة , من شبرامنت اللي كان طاقة نور و بيساعدني اتواصل مع اهلي في ايام اللي مفيش فيها اتصال.
مره شفته جاي من بعيد , قولت له انت ابراهيم اللي كنت ف الامن ؟ قالي اه , قولت له انا بحترمك اوي يا ابراهيم , قالي انا ما قابلتكش قبل كده اصلا , قولت له انا ما بنساش اللي يعاملني بإحترام. ابراهيم عمر , دمنهور.
-انا زعلتك ف حاجة يا عشرة طول جيشي؟
- و حتى لو حصل انا مسامحك يا رجب . احمد رجب , الجيزة.
محمود زايد , وحكاوي محمود زايد :))))
اتعلمت منهم ان مش هتخسر حاجة لو كنت نور و ان مش باقي غير الذكرى الطيبة و العمل الصالح و القول الصالح اللي ندعي لكم بيه ف غيابكم.
٢٦-٥-٢٠١٥
ليست هناك تعليقات:
إرسال تعليق