ممتنين لكل لحظة ايمان لمستنا.
لكل لحظة شك عرفتنا و علمتنا.
لكل واحد صدق رسالته ونشرها فكان اول المبشرين و اول المؤمنين ، بنفسه.
لأول من خط بالقلم و اول من نقط الحرف و اول من جمع الرقع فكانت كتاب.
لاول ست قالت هكتب و الكتابة مش للرجال فقط ، الكتابة اصلا مؤنثة.
لكل وحي نرل ولكل حافظ وحي و لكل ساعي بريد و لكل رسول امين.
ممتنين لفعل الارسال نفسه.
للرسايل اللي من فرط املنا في ردودها سميناها " جوابات"
ممتنين للرسايل اللي من غير امل. * انا عالم بها و عليم ولها في روحي و معها ما يعجز الحكي عن وصفه* و الله العظيم.
لكل حد عرف هويته ، بتنتمي لمين لفين لإمتى و حدودها ايه و فين.
لكل حد حاول يعرف هويته ، بتنتمي لمين لفين لإمتى و حدودها ايه و فين.
لكل حد مات وهو بيحاول يعرف هويته ، بتنتمي لمين لفين لإمتى وحدودها ايه و فين.
لأول ضربة على العود و لاول وتر اتشد
لاول نفخة ف ناي و ﻵخر نفخة ف السور
لكل حجرة رفضت تتبني ف سور سجن كان او في سور من الكذا سور و ورا سور اللي بيني وبينك.
لكل مارد كان اصله عصفور ، اتولد يا ناس عصفور و كلنا عارفينه عصفور ، بس هو شاف السور و قال هبقى مارد و عصفور ، عصفور طار و نفذ من السور ، من المكان الفاضي بتاع الحجرة اللي رفضت تتبني ف سور.
ممتنين تاني للحجرة.
لأول ليل يخالف كل الليل ف ظلامه ، لأول ليل حمل سكينة و دفا مش ضلمة.
لكل كلمة شعر رفضت تتقال ف قصيدة مأجورة فحيرت الشاعر الأجير.
لكل قلب خرج من سجن العقل و زنازين المنطق و حكم بقوة الروح ، و لجم العقل الجامح.
لكل روح لجمت النفس و عرفتها حجمها.
لكل حد عرف قيمته عندنا و حبنا ليه وتقديرنا له فكانت معرفته دي صراط مستقيم.
لكل واحد تنازل عن حقه ف الاستسلام و الشعور بالسقوط عشان حس باللي ساندين عليه
لكل واحد عرف الحق و شاور عليه ، من فوق صليبه.
لكل واحد كانت انفاسه الاخيرة زي اللي قبلها بكلمة حق ، فما بدلوا تبديلا.
ممتنين لكل غريب ولكل فقير غربه الفقر ف بيته ولكل حبيب غربه الصد ف قلبها. او الصدا. او غربته كلمة لاء قالها غابرين وصلته النهاردة رجع صدى.
لكل موت جه ف معاده ولكل واحد سلم بيه ، اول ما شافه استضافه وسلم عليه.
ممتنين للحاجة اللي نقصاها كل حاجة ، ممتنين الكمال.
لكل حيوان علمنا الرقي.
" ممتن للقدر الذي جمعنا على فكرة و ان الافكار - لو نعلم - شيء عظيم "
ممتنين للأول قبل الأولين و اﻵخر بعد اﻵخرين.
لأول نفخة روح و ﻵخر نفخة ف الصور.
و اللهم صل و سلم و بارك على عبادك الضالين العاصين.
١٣ ابريل ٢٠١٥
ليست هناك تعليقات:
إرسال تعليق