الثلاثاء، 2 يونيو 2015

امرأة القرن ١٩ : انا مال امي؟

٢٢/٤/٢٠١٥

في مجتمع يمثل المحجبات ٨٥٪ من نساؤه , تسيطر على اعلامه و مثقفيه و منتجاته و اعلاناته و سياساته و مناصبه العليا و منظومته التعليمية اشخاص ذوو نظرة لا تمت للحجاب بصلة , بل و في احيان كثيرة تعارضه. ١
-
في العام ٢٠٠٧ , حصلت مذيعة سابقة في التليفزيون المصري على حكم بإعادتها للعمل بعد فصلها من التليفزيون في عام ٢٠٠٤ بسبب ارتداءها الحجاب.
-
لم ينفذ الحكم , ولكن على غرار الكثير من احكام الحقوق الشخصية , كدخول المنتقبات الحرم الجامعي مثلا , تم تنفيذه , و لم تظهر مذيعة محجبة في نشرة اخبار التليفزيون المصري الا بعد هوجة يناير ٢٠١١
-
" انا لبست الحجاب من نفسي و انا ف خمسة ابتدائي , و على الرغم من كده لحد دلوقت ماحدش من اهلي عرفني يعني ايه حجاب او ليه لابساه , فبقيت متعودة اغطي شعري بس بلبس اللي انا عاوزاه سواء ضيق او شفاف او قصير , مش انتوا عاوزين اغطي شعري؟.اديني بغطيه اهو " ٢
-
ان المتطلع لإعلانات الطريق الدائري و وسائل الترفيه على الشاشات يمكنه ان يجزم ان لا محجبة تسير اسفلها او تشاهدها.
-

يتعجب البِشري " في بداية القرن العشرين كان المجتمع في اشد الحاجة لعلوم الغرب الادارية و التطبيقية , و كمان علوم ادارة مؤسسات الحكومة و  المجتمع المدني ,  و على الرغم من كده اندفع المثقفين ينقلوا الصراعات الفكرية و الجدل الغربي , و ده لاقى هوى عند المحتل " ٣
-
لما تكون كل ال inputs   مش محجبة , ف ال outputs  معذورة انها  تكون ابعد ما تكون عن الحجاب.

لما يكون اختصار الاجمل و الافضل و الاشهر و الاغنى و الاكثر سلطه و الاكثر استمتاع   مختذل في صورة البنت اللي مش محجبه - او اللي مش لابسه حاجه اصلا- و شعرها طاير و الناس بتتفرج عليها " بإعجاب"  ( مع انه مش اعجاب خالص ) .
في حين ان الناحية التانيه , البنت المقهورة ف كل اختياراتها - حتى لو مش محجبة بالمناسبة يعني- و اللي بالنسبة لها "سد الحنك" في افواه اهلها هو حتة قماشة على شعرها , ملهاش اي تلاتين معنى بالنسبة لهم غير انهم"حافظينها كده " و ورثوا البنت ذلك اللامعنى ,  البنت  اللي ورثت اللامعنى  معذوزة لما تكفر بيه.

-
قبل اربعة سنوات اخبرت اخي بنية احدى صديقاتي دخول الوسط الفني :
- هي محجبة؟
- اه

- قولها تقلع الحجاب دلوقت عشان شكلها هيبقى وحش لما تقلعه بعدين
- بس هي مش هتدخل وسط التمثيل وكده

- هتقلع الحجاب
- ما اعتقدش خالص , هي مقتنعه بيه جدا يابني .

- هنشوف
- هنشوف
-
لم يفكر قاسم أمين - احد اصنام الحكومة التي ورثتها عن حكومات ما قبل الجلاء -  لم يفكر و ندماؤه في حل لقهر المرأة في المجتمع يجعل المجتمع متسق مع هوية او شكل معين و محدد له ومنسق , بل اندفع و من يليه في اسلوب الصدمة الذي يعول -أسفًا- الكثيرين عليه , والحق ان اسلوب الصدمة يعد المعول الاساسي للتشوه وكذلك لا يولد سوى التحول من اقصى اليمين الى اقصى اليسار  دون اي سيطرة من الشخص المتحرك نفسه , ودون ادراك اين كان و اين اصبح , يحركه كل سوء مر به و يدفعه امل يأمله.

وهي صدمة تعيد الى ذهني -كمتخصص- الصدمة المعمارية الحضارية التي احدثها الخديوي اسماعيل بمشروع باريس الشرق الذي نتج عنه احلال احياء اوروبية كاملة و اقحامها قي بيئة معمارية لا تنتمي لها اطلاقا , حتى صارت مسخ وسط محيطها - و ان بدت جميلة كوحدة مستقلة - بدلا من ان تحمل اوجه الاختلاف و تميزه.
-
يرى الرافعي ان اوروبا لن ترضى عن تركيا ابدًا , لأن اتاتورك لم يُطبّع شبر من اوروبا بتركيا , لكنه قام بتطبيع كل شبر في تركيا بالطابع الاوروبي و دون عناء من الاوروبيين ٤
-

اذا ففي المحاولة الأولى لعلاج مشكلة المرأة في المجتمع - دعونا نسميها " مشكلة المرأة في القرن ١٩" لسبب ما سيتضح فيما بعد -  ففي هذه المحاولة الأولى نتج عنها انشقاق واضح في المجتمع و تشويه لكلا الجانبين : جانب يرى الججاب تخلف و خلعه تقدم , وجانب يرى الحجاب تعفف و خلعه كفر وخلاعة.

و اذ نورد تجربة قاسم امين فإننا لسنا في معرض تقييمها بقدر ما نعتبرها بداية الصراع و نؤرخ له بها , اذ يعتبرها حزب الحجاب بداية المشكلة و يعتبرها حزب اللاحجاب بداية الحل.

ويظل الصراع بينهما  منذ " طلعة قاسم امين" الأولى وحتى ١٩٦٧ , اذ نجدهم معسكرين يحشذان الهمم و الأسلحة ضد بعضهما , يقدم معسكر اللا حجاب  المتعه و الرقص و العلم و نظرات الرجال والجمال و اوروبا ,  و يقدم معسكر الحجاب حلول عقيمة مغرقة في العقم  , و بين ذلك تقف " مشكلة المرأة في القرن ١٩" دون ان تجد لها حل يرى جوهرها لا مظهرها ,  تقف امام عجز اي تيار غيرهما لا يختصر التعليم او الكتابة او الشهره او الرجل الحسن المظهر و الثقافة و تقديره ال " trés gentel " للمرأة في كونها محجبة او لا , ونخص بالذكر نظرة الرجال اذ اننا نرى ان  الرجال فتنة كما النساء.

تقف دون حل مشكلتها مع تقدم العالم , و عدم مساهمتها فيه.  ولكنها تقدمت في مشكلة جديدة كونها في صراع مشوه ومستورد لا يمثل هوية جديدة ثابتة او تدعيم لهويتها الأصلية , فتحولت من الوقوف محلك سر الى الوقوف بين البين , لا تصدر للعالم اي شيء و تكتفي فقط بإتباع معسكران يستوردان مشكلات و حلول.

---
- احكي لي عن ستي فاطمة
- كانت بتمشي جنبي ولا كأني ماشي مع عمود نور , ما كانش عندنا التلخلف بتاعكم دلوقت

* انا وجدي الله يرحمه *
-
- هو ليه ماما ماكانتش محجبة في صور الشبكه او الخطوبة؟
- ما كانش عندنا التخلف بتاعكم دلوقت

* انا و بابا *
-
ومن ذلك نرى ان جدي من حزب معارضي صدمة قاسم امين المبالغين في تحجيب المرأة ابعادا لها عن " الكفار الذين اضاعوا دينهم"  ,  في حين ان ابي من حزب التشويه الذي نتج عنها , اذ يرى الحجاب تخلف في حين ان بناته محجبات , بل و انه حجّب زوجته بعد الزواج كما كان شائع وقتئذ في المجتمع المشوه.
-
يرى تمّام ان المجتمع بعد هزيمة ٦٧ كان على وشك الانفجار , لذلك رأى عبد الناصر ان ايجاد متنفس لهذا الكبت و الحصار يكون قريب من نفس البيئه سيساعد كثيرا على تحمل الأمر , على تحمل باقي الكبت كله. فبدأت رحلات المصريين الى الخليج. ٥
-
" في عام ١٩٦٩ عندما دخلت كلية طب القصر العيني لم تكن هناك سوى طالبة واحدة محجبة "٦
-
ومع هذه المعطيات , يندفع المصريون نحو الخليج و امواله , فيستوطنون هناك و يتطبعون بطبعه , اكله و شربه و الوانه , ولحاه و حجابه وجلبابه , ثم ملابسه الضيقة ثم تلك الخصلة المتدلاه من الحجاب.

لم يكن استقرار المصريين في الخليج هو المشكلة .

بل المشكلة انهم عادوا.

عادت الابدان المصرية في جلاليب و عبايات خليجية وخصلات متدلية من اسفل الحجاب , وعلاقات بين الرجل المرأة يسودها النفور و الامتهان البيّن و اموال "التحويشة" ولهجة القرن الثاني الهجري ,  لتجدد الصراع بين الحزبين , و تبدأ في مقارعة  الابدان المصرية في البذلات و الجيبات الاوربية و الشعر المنسدل او الطاير-تماما كما يظهر ف الاعلان- وعلاقات بين الرجل و المرأة يسودها الامتهان المستتر و تسليع المرأة واموال "الاقتصاد الحر" و اللهجات الأوروبية.

لتتعمق الفجوة مجددا بين المعسكرين و تطرق هوية المجتمع ككل , و هذه المره كل معسكر ذو اسلحة اقوى من قبل  , ولكن هذه المرة ايضا يصر معسكر الحجاب على انه لن يخرج من القرن الثاني , و يقف خلف معسكر اللاحجاب  الآمال العريضة و المباني الضخمة و الاختراعات العجيبة.
في النهاية اي منهم لم يضع تعريف لمصطلحات مثل التدين  او التقدم او التخلف  , يهيمون في جعجعة بمصطلحات كبيرة أخادة.

وفي النهاية تضيع بينهم امرأة القرن ١٩ مع اتمام ضياع هوبتها القديمة و استمرارها بين بين.

ندخل الآن في العام ال٩٠ لمحاولة قاسم امين الصادمة المشوَهة المشوِهة , ولا تزال امرأة مصر في القرن ١٩ نقف بنفس مشكلاتها , اللهم الا كثير من الجعجعة حول ملابسها.

-
تحدث هوجة يناير لتعصف بكل ما تقدمها من قيود , فلا صديقتي - وقد خلعت الحجاب كما توقع اخي -  ابقت على قيد اهلها لها داخل الحجاب دون افهامها اي معنى له خاصة مع وجودها في وسط يسيطر عليه غير المحجبات - وهي في ذلك لا تدرك انها خرجت من قيد اهلها الى قيد رفاقها و وسطها.-اذ انها تحولت من اقصى اليمين الى اقصى اليسار  دون اي سيطرة منها , ودون ادراك اين كانت و اين اصبحت , يحركها كل سوء رأته من اهلها و يدفعها كل أمل تأمله في وسطها.

ولا انا ابقيت على قيد اهلي ان الدين في الجامع و الا اصاحب المتدينيين وألا اذهب للمسجد الا في الجمعة.
-

وتستقر الهوجة في سبات , وبعد ان بدأت مراجعات حقيقة للأسئله : من؟ اين ؟ متى؟ كيف؟  , نجدها تخبو تماما سريعا.

ليعود كل معسكر لما تعود عليه , فنعود للمائة عام مجددا , ولكن هذه المرة حلول كل منهما تتفنن في العقم , فحزب الحجاب يخرج زمنيا عن القرن الثاني و ينحسر جغرافيا في اماكن اخرى غير مصر , ماليزيا , كوريا , تركيا , اندونيسا , اليابان..الخ ,  و حزب اللاحجاب يخرج جغرافيا من اوروبا , الى انحسار رمني في اوروبا في نهايات العصور الوسطى , فنجده يبذل قصارى جهده حتى يفهم الجميع ان ما نحن فيه هو نفس الذي مروا به في تلك الفتره و ان لا مناص من اتباع نموذجهم وحلولهم حتى نصل الى ما وصلوا له.
------
١٠٠ عام , و الجميع مجمع فقط على ان هناك مشكلة , ولكن الفريقين لا يتوانى كل منهم عن تقديم حلول ابعد ما تكون عن المجتمع و خصوصيته و لحظته التاريخية و فرذية الانسان فيه.
١٠٠ عام و اكثر , ولا تزال " مشكلات المرأة في القرن ١٩" كما هي.
-
يرى مالك اننا اذا استمرينا على النقل من اوروبا بهذا المعدل , سوف نصل بعد ٢٠٠ عام للمشكلات التي لديهم الآن. ٧

ومن ذلك نرى ان محاولات التشبيه بنهايات العصور الوسطى سوف تدفعتا بعد ٥٠٠ عام لما وصلت اليه اوروبا الآن من مشكلات ,  و ان محاولات التشبه بالقرن الثاني ستدفعنا بعد ١٠٠٠ عام لما نحن فيه الان من مسخ.

و الحجاب فيما سبق ان هو الا رمز مختصر لمشكلات الهوية التي واجهت المصريين منذ تراخي الرابطة الاسلامية الشرقية و احتكاكهم مع المنتصر الاوروبي.

الحجاب فريضة , و العلم ايضًا فريضة.

-
ﻟﺘﺘﺒﻌﻦ ﺳﻨﻦ ﻣﻦ ﻗﺒﻠﻜﻢ ﺷﺒﺮﺍ ﺑﺸﺒﺮ، ﻭﺫﺭﺍﻋﺎ ﺑﺬﺭﺍﻉ، ﺣﺘﻰ ﻟﻮ ﺳﻠﻜﻮﺍ ﺟﺤﺮ ﺿﺐ ﻟﺴﻠﻜﺘﻤﻮﻩ.٨

-
يسرني اني نتاج تجربة جدي و ابي , التي دفعتني للتفكير خلافهم  , لأقف الآن امام الجميع , و بمنتهى البساطة  غير مقتنع بالرأيين. و اراهم على خطأ.
غير معترف بأن الدنيا ابيض او اسود , و انا الدنيا ربيع و مليان الوان.
اقف في صف امرأة القرن ١٩ و ابحث معها عن حلول لمشكلاتها يدفعها لمقارعة اي امرأة في اي زمن او مكان ,مفتخرة ومعتزة بما لديها و ما عالجته وتعالجه وما ستقدمه للعالم بعد التخلص من سطوة مسعكري البلهاء.
فلا حجابها سيمنعها عن التقدم ولا سفوزها سيدفعها للأمام , فالأمم تتقدم بالخِضال لا بالخصلات
-

في فترة التجاذبات بين المعسكرين في ٢٠١٢ و حديث عن ان كل معسكر " هيقلع امك الحجاب " و الاخر " هيلبس امك الحجاب "  قال احد الحكماء : ما تعرفوش حد مالوش دعوة بأمي؟
-
طبعا ماحدش هيصدق ان ده مكتوب للرجال في عادات كتير بقالنا ١٠٠ سنه بنتخانق عليها لا تسهم في تقدم حد , مش شبهنا ومش زماننا .  وكمان ده موجه لأكتر من مشاكل مش عارفين نلاقي لها حل ومصممين نستورد او نستعين بآلة زمن.
-
فيه مبحث كده عن الايمان بالإتباع , محتاجين حد يكلمنا عنه ويبسطه لنا وكده , ممكن؟

----

١- كتبت هذه الفقره يوم ما سمعت عن حكم المحكمه المذكور
٢- حوار مع صديقة
٣- ندوة الاحتفال بمرور ١٥ سنه على تأسيس مركز الحضارة
٤- وحي القلم , الرافعي
٥- الاخوان المسلمون سنوات ما قبل الثورة , حسام تمام (مقالات كتبت قبل ٢٠١١ ونشرت في ٢٠١٢)
٦- مذكرات عبد المنعم ابو الفتوح
٧- المسلم في الاقتصاد , مالك بن نبي
٨- حديث شريف

استخدمت مصطلح " نهايات العصور الوسطى لأن لدي معايير اخرى ل"الحداثة " و " النهضة " و كذلك " التقدم " , سنفرد لها سطور فيما بعد.

السبت، 30 مايو 2015

عن صناعة الألهة و عبادة العباد

ﻧﺮﺳﻴﺲ ﻟﻴﺲ ﺟﻤﻴﻼً
ﻛﻤﺎ ﻇﻦّ . ﻟﻜﻦ ﺻُﻨَّﺎﻋَﻪُ
ﻭﺭَّﻃﻮﻩُ ﺑﻤﺮﺁﺗﻪ . ﻓﺄﻃﺎﻝ ﺗﺄﻣُّﻠَﻪُ
ﻓﻲ ﺍﻟﻬﻮﺍﺀ ﺍﻟﻤﻘَﻄَّﺮ ﺑﺎﻟﻤﺎﺀ ...
ﻟﻮ ﻛﺎﻥ ﻓﻲ ﻭﺳﻌﻪ ﺃﻥ ﻳﺮﻯ ﻏﻴﺮﻩ
ﻷﺣﺐَّ ﻓﺘﺎﺓً ﺗﺤﻤﻠﻖ ﻓﻴﻪ ،
ﻭﺗﻨﺴﻰ ﺍﻷﻳﺎﺋﻞ ﺗﺮﻛﺾ ﺑﻴﻦ ﺍﻟﺰﻧﺎﺑﻖ ﻭﺍﻷﻗﺤﻮﺍﻥ ...
ﻭﻟﻮ ﻛﺎﻥ ﺃَﺫﻛﻰ ﻗﻠﻴﻼً
ﻟﺤﻄَّﻢ ﻣﺮﺁﺗَﻪُ
ﻭﺭﺃﻯ ﻛﻢ ﻫﻮ ﺍﻵﺧﺮﻭﻥ ...
ﻭﻟﻮ ﻛﺎﻥ ﺣُﺮّﺍً ﻟﻤﺎ ﺻﺎﺭ ﺃُﺳﻄﻮﺭﺓً

محمود درويش - لاعب النرد

شيخ فلتان

تفحص الوجوه مجددا منتظرا ان يبدي احدهم على الاقل تعجبه ممت يقول, فهو يعلم انهم جميعا يعرفون كيفية الصلاة و نواقض الوضوء و الفروض و النوافل وغيرها من مفردات خطبته التي استبدلها فجر اليوم بخطبته المعده سلفا عن فتنة النساء.
بينما يشرح لهم فضل النوافل , تساءل في نفسه : كيف يخطب فيهم عن فتنة النساء يحثهم على عدم الوقوع فيها و الاستعصام كسيدنا يوسف وقد وقع فيها مساء امس بنفسه الشيخ يوسف.
-
ضحك صديقه مكررا تحديه " سنتقابل يوما ما على طاولة احدى حانات المدينة ولن تكون حينها تلقي على السكارى حديثك الان عن السكر و المخدرات و النساء , لا تسألني كيف علمت فلست مدعي غيب يا مولانا , لكني مندهش من اصرارك على مواصلة زيفك الذي يبدو جليا في عينيك , انك اول المذكبين بكلامك و اول العاصين لاوامرك"
-
اشار الى النادل ان يضم حساب صاحب الركن البعيد الملبد بغيوم الحشيش الى حسابه, وبينما يخرج من الحانه ابتسم لصديقه و حيا كل منهما الاخر بعلامة النصر.

٩ - ١ - ٢٠١٥

شيخ فلتان

تفحص الوجوه مجددا منتظرا ان يبدي احدهم على الاقل تعجبه ممت يقول, فهو يعلم انهم جميعا يعرفون كيفية الصلاة و نواقض الوضوء و الفروض و النوافل وغيرها من مفردات خطبته التي استبدلها فجر اليوم بخطبته المعده سلفا عن فتنة النساء.
بينما يشرح لهم فضل النوافل , تساءل في نفسه : كيف يخطب فيهم عن فتنة النساء يحثهم على عدم الوقوع فيها و الاستعصام كسيدنا يوسف وقد وقع فيها مساء امس بنفسه الشيخ يوسف.
-
ضحك صديقه مكررا تحديه " سنتقابل يوما ما على طاولة احدى حانات المدينة ولن تكون حينها تلقي على السكارى حديثك الان عن السكر و المخدرات و النساء , لا تسألني كيف علمت فلست مدعي غيب يا مولانا , لكني مندهش من اصرارك على مواصلة زيفك الذي يبدو جليا في عينيك , انك اول المذكبين بكلامك و اول العاصين لاوامرك"
-
اشار الى النادل ان يضم حساب صاحب الركن البعيد الملبد بغيوم الحشيش الى حسابه, وبينما يخرج من الحانه ابتسم لصديقه و حيا كل منهما الاخر بعلامة النصر.

٩ - ١ - ٢٠١٥

الجمعة، 29 مايو 2015

الخيال و الواقع / او / الواقع و الخيال

انا مريض بأحلام اليقظة.
انا مهووس بإني أتسمع.

دايمًا بستغرب لما اقابل حد و افضل اتكلم ما ابطلش كلام , انا ليه ما بطلتش كلام؟ هل عشان ورثت كتر الكلام عن جدي و خالي  زي ما بتقول ماما؟ طب ماهو انا بفضل اتحايل ع جدو دلوقت عشان يحكي لي ما بيرضاش و لو رضي بيحكي بسيط.بسيط.
رغم تأكيدات الجميع ان جدي لأمي هو اللي اورثني الرغي , الا اني فاكر كويس ان جدي لأبويا هو اللي كان ما بيبطلش كلام معايا , يعيد من جديد ويفتح مواضيع   يحكي بتفاصيل مكملة للحكي القديم , افكره بتفصيلة مخالفة يوضح لي انها رواية حد اكد له زمان انها غلط و يكمل حكي التغاصيل الجديده , طب لما الروايتين من زمان و انت اتأكدت ان واحده منهم غلط بتحكي الاتنين ليه؟

اقولكم برضو ليه بستغرب اني مش ببطل كلام لما اشوف حد , عشان انا طول الوقت و انا قاعد لوحدي بستحضر حد من صحابي او كل صحابي و احكي لهم عني و عن دواخلي و عن اهلي , احكي لهم الحكي اللي بستغرب اني لما برغي معاهم برة احلام اليقظة ما بقولهوش.

كل كلامي مع الناس و كل الحكي اللي بحكيه اجوف , مفيهوش الصدق اللي بيرضي روحي ويحسسني اني حكيت حاجة عاوز احكيها. كل كلامي حواجز عشان ماحدش يدخل جوايا. عشان ماحدش يدخل جوايا ازاي اذا كنت حكيت لهم كل حاجه و انا قاعد لوحدي؟
او العكس : بستغرب لما بشوفهم وبحكي معاهم  انتوا ازاي ما بتتكلموش؟ مش انا لسه متكلم معاكم قبل ما اجي وفضلت ارغي كتير و حكيت اللي بقوله دلوقت و اكتر كمان ؟  انتوا مليتوا و خايفين تقولوا؟  طيب انا مش هبطل كلام ف مواضيع فارغة بقى عشان كل المهم قولتهولكم ف احلام اليقظة, وعشان شكلكم مش ناويين تتكلموا.

انا بحس اني استهلكت  و اني بحكي اي هبل , حرفيا اي هبل , عشان انا ما ببطلش كلام  سواء فيه حد جنبي او مفيش.

الموضوع مالوش علاقة بتعدد العلاقات او يمكن مالوش اصول بيها , عشان انا فاكر كويس و انا ف ثانوي و كمان قبل كده كنت بفضل قاعد ع السرير بالساعات اسافر ف حتت و اكلم ناس لما بخرج من الاوضه ما بكلمهمش.
و انا ف ثانوي ولحد دلوقت مش عارف الفرق بين الواقع و الخيال , هل الواقع ان كان عندي صحاب كتير ف ثانوي؟ ولا الواقع اني ما اتحركتش من السرير و خلقت علاقات ف احلام اليقظه ؟  طب زمايل المدرسة دول كانوا صحابي؟  هو الواقع اني ضربت العيال اللي مضايقني ف المدرسة؟ ولا الواقع اني بقيت بقلدهم و اصاحبهم و  بزوغ من المدرسة و بروح العب معاهم الملاعب و السيبرات و برضو ما حبونيش؟

الحاجة الوحيدة اللي كنت بهرب بيها هي تطوير المواقع و البرمجة , واقعي الوحيد حرفيا , الحاجة اللي كانت بتخليني قاعد ف السيبر اكتر من ١٢ ساعة بعمل اي حاجة اي حاجة غير اني اتكلم مع ناس مش موجودين. بعمل حاجه بتميز الواقع عن الخيال , بسيب ف الموقع Bug عشان اصلحه تاني يوم , واقع اهو يوم بيكمل يوم.

فيه بنت صاحبتنا كل ما بشوفها بتقولي "احكي لي" الحقيقة اني اول ما بسمعها بتقول كدة بتفزع جدا. بحس انها بتتريق عليا , يابنتي ما انا لسه حاكي لك قصص كتير امبارح. بس بنتبه اننا بقالنا شهر مثلا ما اتقابلناش.
كل ما اوعدها اني احكي لها حاجة و اشوفها وما احكيهاش  ما بحسش بأي تأنيب , عشان ببقى واثق اني حكيت لها خلاص و ان اشطة هنتقابل نهري ف اي حاجة غير الحكي اللي اتفقنا عليه عشان انا حكيته خلاص.

قبل ما انزل الاجازه اللي فاتت كنت مقرر اني اجمع صحابي بتوع الكلية و احكي لهم عن حاجات مهمة ف حياتي  من باب المشاركة و تدعيم علاقتهم بيا وتعزيز فهمهم ليا (مش العكس) , و فضلت ارتب المواضيع , و بعد ساعتين تلاتة اكتشفت اني لسه ما خلصتش حكي في المواضيع دي. حتى اللحظة دي انا مش متأكد انا عملت كده الأجازة اللي فاتت ولا لاء.

هو الواقع اننا بنحب بعض بقالنا سنه ؟ ولا الواقع اني صارحتها من سنة و رفضت وانسحبنا , و انا نسجت السنه دي كلها ف احلام اليقظة؟
وهي بتقولي ما بحبكش تناديني بكذا , ومش  عاوزه نتكلم تاني , اخدت الامور بكل بساطة و قولت لها بكل ثقه : اشطه انا مش هناديكي كده وهقفل خلاص بس انتي عارفه اني هجيبك قدامي وهفضل اكلمك و اناديكي بكدة و اشطه عادي. هو انا قولت لها كده بثقة عشان عارف اني بكلم خيالي , اللي هو " بالراحة ع نفسك شوية انا عارف انك خيالي بيتكلم" ؟
اللي قولته سواء كان ليها ولا لخيالي هو اللي عملته و بعمله دايما , مش عشان هي البنت اللي انا بحبها وبس ,  ده عشان انا بعمل كده مع كل الناس برضو.  بمشي بمبدأ keep talking و ف الاخر خيالي موجود وهنقعد سوا  تسمع اللي عاوز اقوله و يمكن كمان اتطور بعدين و اخليك تقول اللي عاوزك تقوله.

انا بقيت بركز اوي قبل ما بحضن الناس و قبل ما اقول لحد وحشتني مثلا او كده , انا بقيت بحضن الناس بذمة حضن مطول , اتأكد فيه قدر الإمكان انهم قدامي فعلا و بين ايدي.  قبل ما اقول وحشتني بكون وقفت مع نفسي لحظة ادركت فيها ان مقابلاتنا ف اخر شهر مثلا كانت كلها احلام يقظة ما اتحركتش فيها من مكاني اصلا , فإشطه يبقى هو لازم يوحشني فعلا.

عاوز اقول لها انها وحشاني وبقالي سنة ما شفتهاش, اقولها ازاي اذا كان ده ممكن يكون ما حصلش؟ بس احنا اتفقنا اننا ما بدأناش؟!!! ياه لسه تاني؟!

يعني مثلا , انا بحكي عن ماما كتير  , بس بكلمكم عن ماما العادية اللي ممكن شبه اي ام تانية , لما قعدت مع صحاب الكلية قولت لهم كده و حكيت لهم ان ماما ف مرضها بالفشل الكلوي مرت بتلات مراحل : اول انتكاسة ساعة ما اغمى عليا ف الجامعة و تاني مرة ساعة ما اتصلت اهزر معاها و اقولها اني هفجر نفسي وتالت مرة يوم رمسيس.

هو ده الواقع ولا انا عاوز اشيل نفسي ذنبها ف احلام يقظتي ؟ هي التلات ايام دي حصل فيها الانتكاسات التلاتة فعلا ؟ ولا هي الايام اللي انا اكتشفت فيها الانتكاسات دي؟

هم صحابي عرفوا ده قبل كده ولا هيعرفوا لما يقروه ؟

انا عارف ان ده مرض , وعمري ما دورت على اسبابه او على علاج ليه و عمري ما اعتبرته حالة انتشي بيها , دايمًا لما بتجيلي لحظة الادراك دي بفضل مذهول , حتى دموعي ساعتها ما بعرفش هي واقع ولا خيال.

انا حياتي اتحولت ل "ياه لسه تاني؟!"  هعيد اللي قولته و اعيش اللي اتخيلته  , ده كتير و متعب ومرهق.  اذا كان متعب كده و انا لسه مش متأكد هو واقع ولا خيال , اومال هيبقى متعب ازاي لما اتأكد؟.

حازم اننا من كتر انغماسنا في الخيال ما بيقناش نحس بحاجة ولا حاجة تفاجئنا عشان "شوفنا كتير " فبقى كل الواقع جزء مر علينا ف خيالنا. قالي كده من غير ما افتح معاه الموضوع.

الكلام ده لازم يتنشر عشان يتحسم امره , مش زي باقي المرات.

تفتكروا انشره ف حتة ماحدش يعرفها عشان احس بارتياح البوح و ابقى ف نفس الوقت عندي دليل اني قولت الكلام فعلا ما تخيلتوش. 
ولا انشره ع فيس بوك؟  اللي بيقولي لما اقفل الاكونت ان ٦٩٥ صديق مش هيبقوا على اتصال بيك لو قفلته؟
انشره ع فيس بوك بابلك ولا لل ٦٩٥ صديق بس؟ هم اصلا اصدقائي؟ لاء. فإشطه بقى خليها بابلك.
وبابلك ليه؟  اخش تاني ف الصراع الازلي : هو من حق حد يعرفني او ما يعرفنيش انه يشير تجربة خاصة بيا؟  و زي كل مره استسلم و انا مش عارف استسلمت لإيه هل سمحت لهم بكده ولا ما سمحتش؟
هو انا قولت لهم ان عندي مدونة بشيل فيها الكلام ولا ما قولتش؟  مصيبة لأكون قولت و اقرر انشره ف المدونة عشان ماحدش يقراه و يطلعوا عارفينها و يقروه

لازم يبقى عندي دليل اني قولت الكلام ده. كفاية بقى كفاية.