رسالة قبل التخرج و خلاصة الكلام .. الثانوية هي الأجازة

المفروض اني هتخرج السنة دي , و ده يحملني مسئولية نقل تجارب وخبرات عايشتها , 
و اهم ناس مميزين ف حياتي وشايفهم محتاجين يعرفوا غيرهم عمل ايه هم صحابي المميزين في
ثانوي وكده , 
اما و ان كتير منهم او كلهم عاوزين يعملوا حاجه ف حياتهم غالبهم فعلا اشخاص غير تقليديين .. 

حابب اشارك الخلاصة دي من تجربتي و انا ف ثانوي ( و نظرتي ليها بعد ما مرت ) : 

بصوا , كل حاجة بتيجي ع بالكم دلوقت ومش بتعملوها بتسبب لكم حاجز , و حاجه كده زي توهان البوصلة , نفسك مش بتبقي مستقرة , ولو مش حاسس بده , بعدين هتحس بكده . ..

الظريف بقى انك لو شخصت زي حالاتي قررت انك لا تتعايش مع التوهان وعدم الاستقرار ده , هيعدي عليك الوقت كتير او قليل وهتلاقي نفسك بتعملها , بس عشان بوصلتك تهتدي و نفسك تستقر ...

انا ف ثانوي كان نفسي اجرب اني اقول لبنت مش بحبها اني بحبها بس عشان اشوف رد فعلها و نظرة صحابي ليا قبل و بعد ما يعرفوا اني مش بحبها .

انا ف ثانوي كنت بتفشخ تريقة عشان شعري . وشكلي عموما

انا ف ثانوي كنت عاوز اعمل دعوه للتظاهر ضد تأخير البوم عمرو دياب عشان اتريق ع النظام اللي منع التظاهر ضد ضرب غزة

انا ف ثانوي كنت عاوز اكتب يوميات

انا ف ثانوي كنت عاوز اشتري دومينز و هوستس و ابرمج موقع من الصفر

انا ف ثانوي كنت عاوز اقول لبابا و للمدرسين ( رأيك يحترم , بس هعمل اللي ف دماغي ) ( كنت بعمل اللي ف دماغي من غير ما اسجل الموقف ده )

انا ف ثانوي كان نفسي اغني ف الشارع و اللي يبص لي بإستغراب أقول له و انت مالك ( كنت بعملها برضو بس من غير ما اسجل موقف )

و انا ف ثانوي كنت عاوز امشي ف الشوارع بالليل كل الشوارع اللي بمشيها بالنهار

كان نفسي اقول لأهلي ولكل العالم : ببساطة انا بحب التاريخ ومش هدخل امتحان الكيميا ( قبله بشهر تقريبا ) و انا هدبلر في تالثة ثانوي عشان دي خطتي من يوم ما سمعت المدرسين (ف اولى اعداي) بيتكلموا ف المكتبة عن سنة فراغ مجامعيع الكليات فيها هتنزل جدا ..

الخلاصة و بدون التطويل في ذكريات ومواقف بتعرفني قبلكم , ازاي كانت بوصلتي مضطربة ونفسي غير مستقرة و انا عاوز اعمل حاجات ملهاش علاقة ببعض وكتير منها ممكن يكون تافه , غريب , متمرد , الخ بالنسبة للمحيطين بيا ..
و ازاي بعد ما عملت اللي قولته فوق ده وحاجات كتير او ما يعادل وقعها في نفسي , اكتشفت اني فاتني كتير اوي و انا ف ثانوي ..

ثانويتك بتاعتك . . اوعوا الثانوية تتسرق منكم 

" لا شيء يخيف هنا ... ولا مفاجأةٌ هنالك "